Shakra-Sound cha Muet mache !!

Do no es chlises Gschichtli, wo sicher alli Shakra-Members gärn wärde läse....so cha doch dr Sound au e ganz wichtigi Funktion ineh! Vor eim Johr het isch mi Muetter an Bruschtchräbs erchrankt und die Zyt isch für eusi Family e sehr schweri Zyt gsi. Ganz unbeschriblich schlim sin die 2 Wuche vor dr grosse OP gsi (beidi Brüscht hei müese amputiert wärde). Mi Mom het im Vorfeld vo dr OP regelmässig Shakra glost....au no im Spital vor dr OP und d`Power und Energie vom Sound het doch immer wieder ghulfe, ihre Muet z`mache und somit hän dir mit eurem Sound do e ganz wichtigi Funktion dörfe überneh (Danke euch dofür vo ganzem Härze!), ohni das ihr euch das bewusst si gsi. Geschter Morge het si erneut müese operriert wärde (es witers Gschwür...wo sich als guetartig usegschtellt het müese entfärne und en künschtliche Bruschtufbau) und d`Angscht isch au jetzt wiedr en Begleiter gsi. Und au jetzt wieder am Obe vor dr OP het si sich im Spital über en Discplayer "Infected" aglost und au jetzt het eure Sound wiedr echli mitghulfe zum Muet mache....es isch den geschter au alles guet gange bi dr OP. I ha das jetzt gärn welle mitteile, au zu zeige, das eure Sound e ganz wichtigi Funktion cha ha wo übers eifache konsumiere cha übergriffend si. Möchet witer so und gäbt Gas, nomol es dicks, fetts Dankscheen, das ihr do echli hei chönne mithälfe! Forever Let`s Rock ! ! Geile Sound isch eifach Läbeselixier

Oh jöööööööööö... so härzig!!!

Ig wünsche dire mueter u dir viiiiiu glück und chraft für d zuekunft!!!
und uf das dini mueter dür shakra immer chli muet und chraft wird chönne ufnä

hammer story!!!

wünsch dir und dinärä mam alläs guäti und immer schön infected bliibä!

Hey Andy das freut mit, dass das Gschwür guetartig isch gsi! Ich drugg dinere Familie witterhin dr Duume dass es das Joor e bessers Joor wird!

i danke euch allne, das freut mi (eus) sehr! D`Stimmig isch mittlerwile sehr guet und mir si positiv igschtellt :-) ! Und mini "Oldies" (Muetter und Vater) wärde au sicher emol wiedr mitcho anes Shakra-Konzärt und dr Altersschnitt chräftig ahebe . Allersits e gueti neui Wuche