Iron Maiden Basel!

Gseht so us als wär das do in däm Fänschter langsam mis Spezialgebiet, extärni Konzärtbricht. Geschter isch dr gröschti Teil vom Shakra-Umfäld klar am letschte Gig mit em Oli gsi (alles gueti Oli und Merci!!), mi und mini Fründe hets aber ans Maiden zoge, wo mir Tickets scho lang ,lang im vorus gsicheret hei (odr in mim Fall gschänkt becho:)), zumol no in Basel, also es Heimspiel! D`Setlist vo dere Retro-Tour isch jo lang im vorus bekannt gsi und durchs Internet geischteret und do hets au kei Platz geh für sponatni Aenderige (Arrrgghhh....i hät mir so sehr "Stranger in a Strangeland" gwünscht!!) und die ganzi Maschieneri isch gloffe wie es Uhrlaufwärk, perfäkt, ischtudiert, T.O.P.-Show mit wunderbare Hintergrundbilder wo sich immer abgwächslet hei, perfäkte Sound......es isch eigentli alles perfäkt gsi und genau das finde i irgendwie echli Schad, do ichs immer bevorzuge, wenn me mit dr einte odr andere Uebrraschig dörf rächne, z.B. ebe in dr Setlist, wo di ganzi Tour di glichi isch gsi. Aber es isch scho geil gsi, emol wiedr Tracks wie Powerslave, Revelations odr Rime of the Ancient Mariner Live dörfe z`ghöre, definitiv! Aber die sit Johre zum Standard und Sicherheitsprogramm ghörende Hits hän notürli nid dörfe fehle, scho well das die breiti Masse wot ghöre, aber ebe.....dört hät ich mir persönli echli mehr Risikobereitschaft gwünscht, und au gärn emol eine vo dene "Hits" wome sit x-Johr uf jedere Tour ghört, usekickt . Aber bi somene riesige Unternehme wie Iron Maiden spiele halt vili Faktore e grossi Rolle........so au d`Merch-Prise! Das isch in de gängige Magazin scho gnueg abghandlet worde, aber 60 Hämmer für es Shirt isch dr Waahnsinn! Und solang die Shirt glich kauft wärde, wird sich do dra au nüd ändere. Und do bin ich au mitschuldig, schliesslich bin ich au weich worde und ha imene Megageniale Shirtmotiv nid chönne wiedrschtoh....schämm ! Trotz allem, es het Spass gmacht, isch en tolle Obe gsi und d`schtimmig in dr St.Jakobshalle isch grandios gsi, es ächt Tollhuus ! Und em Adrian Smith sini Leads verursache bi mir no immer Hüehnerhut!!
Wünsche allne es scheens Wucheänd !

I bin natürlech au am maiden gsi wie immer 8)Klar hätti de letst shakra gig au gärn gseh aber i bin vor einiger zit wo d maiden tickets usecho sind scho am morge am schalter gstande!das het me sich eifach ned chöne lo entgoh lo!Mh Andy i weiss jo ned, aber d akkustik het mi im hallestadion amigs chli besser donkt!?ufgfalle isch wie jedes mol bi maiden dass die meiste lüt nur die grosse hits kenne.. d show isch wie immer genial gsi jo da met de merch priise stimmt leider i findes au vell,aber i bin halt amigs z fest agfrässe vonene. sie sind jo ned grad ständig i de schwiiz! schön wer gsi wens i minere grössi shirt au gha het woni ha welle chaufe jetzt muessis halt söscht irgendwie chaufe..

Wo bisch den du gschtande Moonchild? I has oft erläbt, das wenn me dr Standort wächslet dr Sound ame besser isch. Mir si grad links vom Mischpult gsi und eus hets guets dünkt. Mir het vorallem dr Druckvolli Drumsound gfalle. I hamers klar schlimmer vorgschtellt, den es isch jo bekannt, das in dr St.Jakobshalle dr Sound echli schlächter isch als z.B. im Hallestadion. Und es isch scho so wie du au schribsch, vili Bsuecher kenne eifach d`Hits, si aber mit de Albums chum odr wenig vertraut und die wänn halt au die Hits ghöre. Das isch halt leider di breiti Masse und es grosses Unternehme wie Iron Maiden isch ebe au irgendwie verpflichtet, d`Chundschaft z`friede z`schtelle. Obwohl, uf ihrer letschte Tour sind si jo au es waagniss igange, wo si di ganzi neui CD komplett gspielt hei und das het ihne jo au rächt Kritik ibrocht. Uebrigens, Maiden-Shirts gits fascht an allne ecke odr in div. Onlineshops z`bschtelle....in allne grössene! So u.a. bi www.exlibiris.ch odr www.funshop.ch, die hei ame au Maiden-Artikel, etc , und au günschtiger.
Aber ebe, ich ghöre jo au zu dene agfrässene, wo dr Versuechig nid het chöne wiederstoh und so en Lumpe heignoh het

ähm chli witer hinde als du und de spöter bini no chli wieter ufe!jo aber demfall hani ned unrächt was die halle abelangt do hesch scho rächt was die letsti tour abelangt,bin au gsi. de grossi teil vo de lüt sind zemmlech entdüscht gsi damols...mh merci för d hilf, aber das hilft mir leider ned wieter! tourdate müend ebe droffe sie,e mim fall welle lompe hesc de kauft?i will ebe de navy blau vo powerslave! gfonde hanen scho,aber ebe ohni date hinde droffe.Naja, i han jetzt mol an maiden store gschrebe.vellecht ergit sich jo öpis...bin jetzt nämlech scho x-stonde am netz wäge dem*grrrr*

hoi zäme

also d'show isch super gsi - wiä immer. aber mir händ müeh gha mitem sound, d.h. dr akustik.

mir sind ganz z'hinde gsässe (rollstuehlplätz) diräkt gägenüber dr bühni.

bi eus hinde häts scho bi dä vorgruppe gschepperet. jewils am schluss vom stück häts bi dä gitarre napfiffe. d'stimm vo dä sängeri hät klirret.

bi maiden händ d'gitarre nümi pfiffe, aber klirret, genauso wid stimm vom sänger.

ich tänke, dass äs i dr st. jakobshalle scho druff a chunnt, wo mä sitzt.

rockigi grüess
gabriela

Das isch eso Gabriela, den bi eus hets nid eso schlimm töhnt wie du beschriebsch.
Moonchild: I has Shirt kauft mit em Albumcover vo dr neue Best Of und uf dr Rucksite isch es Live After Death-Pic in dr mitti, obe dr Tour-Schriftzug und unte stöhn....nei, nid Tourdate....aber es si alli Länder erwähnt, wo die Tour dure goht. Das blaue Powerslave-Shirt wo du erwähnt hesch gits im neue EMP-Katalog (hani grad hüt becho), weiss allerdings nid was dört hinte druf stoht. Vilicht kontaktiersch emol EMP? Sunscht wird se sicher zumene spötere Zytpunkt im Handel geh, wenn Tour vorbi isch. I drück dr Dume das de dörfsch fündig wärde !