Tarot - Dynamo Zürich

Bhuuuu, das Konzärt isch präggt gsi vo wandelnde Iidrügg. Z'aller erscht hän die mi vom Dynamo gnärvt, will ich ha ihne es Mail gschriibe, wo me denn am beschten könn parkiere, aber die dumme Zürcher häns nid für nötig ghalte, mir zrugg z'schriibe. Also sin s'Rämi und ich halt eifach soo aane gfahre. Positiv überrascht hett mi denn, wie guet mis Navi doch funktioniert, glaub suscht hätte mir das Dynamo nie gfunde. Ebeso positiv überrascht bi ich vo de Lütt im Marriott Hotel gsi, wo ich bi gsi go frooge, öbb ihres Parking 24 Stund offe isch. Do ich nid unbedingt grad däm Hotel-Niveau entsprächend aazoge gsi bi (schwarzes Jüppli, Netzstrümpf, New Rocks......), hätt ich dänggt dass ich chli komisch aagluegt wird, aber si sin mega nätt gsi.
Denn sin mir zum Dynamo gloffe, was numme grad 2 Minute gange isch, tip top. Nachdäm mir dr obligati, aber in mine Auge völlig sinnloosi "KOPIE" Stämpel bekoh hän, sin mir z'erscht mol uf d'Toilette. Und die ka ich jetzt leider grad gar niemerem empfähle. Mir hän denn numme dänggt "Mir mache's wägem Marco.....".
D'Vorband isch denn e relativ jungi finnischi Band mit Name "Men eating Tree" gsi. Dr Sänger hett e super Stimm gha, allerdings isch jede Stück so chli träg gsi und wirgglig gueti Stimmig hett nid welle ufkoh. Dr Liechtblick dört isch gsi, wo dr Marco uf em Balkon uftaucht isch und dene zuegluegt hett. S'Rämi und ich sin denn immer widder irgendwie abglänggt gsi

Denn isch es ändlich sowitt gsi, Tarot sin uf d'Bühni koh. Und was söll ich sage, si hän dä kleini Saal so richtig grockt. Leider hän ich numme grad öbbe 3 Lieder so halbwäggs kennt, aber das hett gar nütt usgmacht, Spass hett's einewäg gmacht, vorallem wäg ihrne Zwüschekommentär wo nach jedem Lied koh sin. Ich könnt mir allerdings vorstelle, dass sich einigi im Publikum chli verarscht vorkoh sin. Si hän uuse miesse go rauche und bi Tarot hett's kuum 5 Minute gäh, wo nid eine (meischtens dr Zachary) e Zigarette zwüsche de Lippe gha hett. Ganz cool han ich au gfunde, wo dr Marco irgendwenn em Lichtmensch vom Dynamo gseit hett, är söll doch das mit dr Rauchmaschiine loh, "it smells really bad"!!!! Und do dermit hett är mir us dr Seel gredet gha.
Alles in allem isch es e super Konzärt gsi und Tarot giengt ich grad sofort widder go luege, allerdings miesst ich mir überlegge, öb ich nonemol ins Dynamo giengt.....
Fötteli kömme denn no ganz vyl (meischtens isch aber numme ei bestimmti Person druf )

Merci für dä Bricht! Freue mi scho uf d'Föteli...

Danke füre Bricht, Cathy!

De lahni das vorläufig mitem Dynamo!

Cool, merci füre Bricht!

I bi o no nie i däm Dynamo gsi

Leider ka ich's au niemerem aarote. Irgendwie schmeggts au überall ganz komisch.......

So, und jetzt es paar Fötteli:

Merci vieu mau Cathy fürä Bricht u di super Föteli ( isch scho öpperem ufgfauä wi nöch mir a dr Bühni gstangä si *schmaaaaaaaacht*)
Dä Bricht chani numä ungerschribä, isch äs mega tolls Konzärt gsi, musikalisch wi unterhalterisch ("Don't forget! We're evil!" ) u de ersch dä Ablick

*grins* dir heits ja gnosse

Merci für die Föteli, i ha ja bis hüt nid gwüsst wie die Type vo Tarot usgseh