Leider dörf d'Sorci dä Bricht, usser dr letschte Ziile nid lääse, do si jo numme öbbis hett welle ghöre, wenn's schlächt gsi isch
Also z'erscht zu de Vorbänds:
Mastodon: hän mir leider nid gseh, sin mir zu spot dra gsi.
Lamb of God: em Alain hän si super guet gfalle, ich ha miesse sage: ich ha scho schlächters gseh, aber definitiv au scho bessers. Isch richtig abgange, aber ebbe, irgendwie isch dr Funke bi mir nid übere gsprunge.
Denn isch denn aber Metallica cho. Do muess ich aber no vorusschicke, mir hän Sitzplätz gha und wo ich im Saalplan gluegt ha, wo denn dr Sektor O1 isch, han ich dänggt, oje, das isch jo ganz hinde, do wärde mir worschinlich nid sooo vyl gseh. Mir sin denn uufe und bi einere vo de erschte Düüre han ich mol in s'Stadion iigluegt und ha nid schlächt gstuunt, wo ich gseh gha ha, dass Metallica widder ihre "Gäg" vo de 90-er Joor gmacht hän und die ganzi Bühni in d'Mitti wo dr Halle gstellt hän. So hett me um die ganzi Bühni umme könne stoh und auch dr Sektor O1 isch nid so witt wägg gsi vo dr Bühni. Cool isch au gsi, dass so öbbe all 2 Meter e Mikrophon uf dr Bühni gstande isch, mit de entsprächende Monitore vorne dra, und s'Schlagzüg isch z'mitst in dr Mitti vo dr Bühni gstande! Und denn isch denn ändlich s'Liecht abgange. Die Herre (do ka me jo nümm vo "Jungs" rede
) hän d'Bühni gstürmt. Als Liecht sin numme unzähligi Laserstrahle z'gseh gsi, und dr James isch, wenn är am singe gsi isch, vo unde här aagstrahlt worde. Die andere 3 hett me fascht nid gseh. Am Änd vom Lied (cha leider nid sage, welles dass es gsi isch, s'isch eins vo de neuere, spricht nach em Black Album gsi) isch denn alles Liecht aagange und s'getobe isch no meh ab gange. Nach wittere 2 oder 3 Lieder (bi schlächt im bhalte vo de Reihefolge) isch denn s'Liecht widder abgange, Helikopter-Grüsch sin koh und plötzlich hett d'Bühni brennt, s'isch Zytt gsi für ONE. Natürlich han ich mir d'Bemerkig nid könne verkneiffe dr Alain z'froge, wo denn ächt dr James jetzt grad würdi stoh, sini Antwort: "Natürlich z'mitst dinne, dört wo är aane ghört!"
(Vor einige Joore isch dr James chli z'noch am Pyro-Züg gstande und hett sich ganz bös dr Arm verbrennt!). Denn goht e Spot aa, und wo stoht dr James, z'mitst imene Halb-Kreis vo Flämmli
Isch extrem guet gsi!!!!! Si hän denn witer e Mischig us alte und neue Lieder brocht (z.B. Sad but True, Holier than Thou, Master of Puppets...) und denn hett's s'Obligate Solo vom Mr. Hammet gäh. Wenigschtens hett är glernt und macht si nümm 20 Minute lang. Denn isch e Hocker uf dr Bühni gstande und s'isch Zytt gsi für Nothing Else Matters, am Aafang elai vom James und sinere Gittarre gspiilt gsi, isch Hammer gsi!!!!! Nach einige neue Lieder isch denn no Enter Sandman gloffe, glaub dört hätt dr James gar nid miesse singe, s'Publikum hätt's au elai könne
Abartig geili Stimmig gsi!!!
Ganz cool isch au gsi, dass sich s'Schlagzüg vom Lars ufeme Podest befunde hett, und das hett me immer widder mol um e viertel Dreihig kehrt, so hän alli öbbis vo ihm gha. Für si Alter ka är no ganz schön druf umme hau, RESPECT!!!!!
Mi's Fazit vo däm Konzärt: dr James hett rächt öbbis derzue glernt in Sache singe (s'letscht mol wo ich si gseh ha isch am Monsters of Rock in Basel gsi), dr Kirk spiilt immer no super und dr Lars goht ab wie s'Krümel-Monster. Bim Bassischt bi ich nid so sicher, wie är in d'Band iine passt, är kunnt jo ursprünglich vo de Suizidal Tendencies und das gseht me! Aber ich würd uf jede Fall widder goh.
S'hett numme ei Schwachpunkt gäh
ACHTUNG SORCI, SATZ FÜR DI: Mir hän si trotzdäm no z'vyl "neui" Sache brocht, mir wär es Konzärt mit Lieder bis zum Black Album lieber, aber isch ok so!
Startseite 
Deför hani gmerkt dass me de basler fraktion ned umbedingt chan troue.... 
Nächst mol nemmi die sach lieber weder sälber it hand 
Vo mor us chönt böni bi de konzärt öffters i de metti stoh! Isch vell besser gsi als ich z erst dänkt han..
Mir sind de au i de reihe 23 a cho und s het gnau no 4 plätz frei gha wies het müesse sie,osserdem hani mi dört bestens metem sitznochber unterhalte. Bes de alain gseit het: DU do sind paar die händ gnau s gliche ticket wie mir! Naja mir sind im sektor N gsi statt im O 
